Velferð barna mest í norðurhluta Evrópu

Hagur barna í iðnríkjunum mælist að meðaltali verstur í Bretlandi og Bandaríkjunum samkvæmt skýrslu Barnahjálpar Sameinuðu þjóðanna (UNICEF) sem kom út í gær. Skýrslan er sú fyrsta sinnar tegundar þar sem velferð barna í iðnríkjum er mæld út frá sex flokkum.

Norðurlöndin, að Íslandi undanskildu, röðuðu sér ofarlega á heildarlistann. Svíþjóð, Danmörk og Finnland voru í 2., 3. og 4. sæti og Noregur var í 7. sæti. Holland er í efsta sæti af 21 þjóð sem mæld var í öllum flokkunum sex og var á topp tíu í þeim öllum. Níu þjóðir, þar á meðal Ísland, skiluðu ekki inn upplýsingum fyrir alla flokka og eru því ekki taldar með á heildarlistanum yfir meðaltal flokkanna.

Flokkarnir sex sem voru notaðir til að mæla velferð eru efnislegur auður, heilsa og öryggi, menntun, samband við jafningja og fjölskyldu, hegðun og áhætta, og huglægur skilningur barnanna á velferð.

Staða Íslands var greind í þremur flokkum: heilsa og öryggi, menntun og huglægur skilningur barna á velferð. Ísland var í öðru sæti þjóða í flokknum um heilsu og öryggi á eftir Svíum og í þrettánda sæti í menntunarflokknum, neðst Norðurlandanna. Ísland komst ekki í sæti í þriðja flokknum þar sem upplýsingar voru ekki fullnægjandi.

Athygli vekur að engin augljós tengsl voru á milli velferðar barna og vergrar þjóðarframleiðslu ríkjanna samkvæmt niðurstöðum skýrslunnar. Til dæmis var Tékkland, sem var í 15. sæti, með hærra meðaltal í flokkunum heldur en mun ríkari lönd á borð við Frakkland, Austurríki, Bandaríkin og Bretland, sem voru neðar á listanum.