Hundrað féllu í árásum í gær

Að minnsta kosti hundrað manns létust í skotárásum og sprengingum sem beindust að skotmörkum Sjíta í Bagdad, höfuðborg Íraks, í gær. Tæplega áttatíu manns létust í sprengingu á markaði í mannskæðustu árás sem orðið hefur í Írak í einn og hálfan mánuð. Í lok nóvember létust 215 manns í árás í Bagdad sem talið er að al-Kaída hafi staðið á bakvið og fól í sér hrinu bílsprengja og sjálfsmorðsárása.

Uppreisnarmenn Súnníta og herskáir Sjítar hafa gert höfuðborgina og umhverfi hennar að vígvelli átaka sín á milli. Árásir uppreisnarmanna Súnníta hafa verið að færast í aukana undanfarna daga vegna Ashura trúarhátíðar Sjía sem hófst á sunnudag. Á fimmtudaginn síðastliðinn létust 142 Írakar, þar af 65 háskólastúdentar í einni sprengingu.

Alls féllu 25 bandarískir hermenn í Írak á laugardaginn. Fleiri hermenn Bandaríkjahers í Írak hafa ekki látist á einum degi í tvö ár. Er þetta þriðja mesta mannfall á einum degi síðan stríðið hófst í mars 2003.

Á sunnudag komu um 3.200 bandarískir hermenn til Íraks, en þeir eru fyrsti hluti af 21.500 manna liðsauka sem George W. Bush Bandaríkjaforseti hefur ákveðið að senda til Íraks.