Chelsea vill Luca Modric

Chelsea hefur mikinn áhuga á króatíska miðjumanninum Luca Modric. Avram Grant, knattspyrnustjóri Chelsea, fylgdist með Modric í landsleik gegn Makedóníu um helgina. Modric leikur með Dinamo Zagreb.

Roman Abramovich á síðan að hafa sent einkaþotu sína til að ná í stjórnarmann Dinamo Zagreb og fljúga með hann til viðræðna í London.

Henk Ten Cate, aðstoðarmaður Avrams Grant, reyndi að fá Modric til Ajax þegar hann var þjálfari hollenska liðsins. Arsene Wenger, knattspyrnustjóri Arsenal, hefur einnig sýnt Modric áhuga.

Þess má geta að Modric skoraði á KR-vellinum fyrir tveimur árum. Þá var hann að leika með U21 landsliði Króatíu gegn íslenska U21 landsliðinu. Króatíska liðið vann 2-1 og skoraði Modric seinna markið.