Sms-skilaboðunum rigndi yfir Ben-Haim

Ensku landsliðsmennirnir voru vitanlega ánægðir þegar Ísraelar lögðu Rússa í undankeppni EM á laugardaginn en það þýddi að enska liðið á enn möguleika á að tryggja sér sæti á EM.

Félagar ísraelska landsliðsmannsins Tal Ben-Haim hjá Chelsea voru duglegir að senda honum sms skilaboð eftir leikinn til að óska honum til hamingju með sigurinn og þakka honum fyrir að greiða leið enska liðsins. Sum skilaboðanna komu meira að segja meðan á leiknum stóð.

"Auðvitað fékk ég skilaboð frá þeim. Frá John Terry, Frank Lampard og þeim öllum. Ég vil ekki segja hvað þeir sögðu en þeir eru auðvitað ákafir að komast á EM og nú er þetta undir þeim sjálfum komið," sagði Ben-Haim, sem upplýsti að nokkur sms skilaboðin hafi borist á meðan hann var að spila leikinn.