Varnarmálanefndin samþykkti Gates

Varnarmálanefnd Bandaríkjaþings samþykkti einróma tilnefningu Robert Gates sem varnarmálaráðherra Bandaríkjanna. Gates kom fyrir nefndina í dag og svaraði spurningum þeirra. Öldungadeildin mun í framhaldinu greiða atkvæði um tilnefningu Gates og ræður það því hvort hann taki við embættinu af Donald Rumsfeld.

Ekki er búist við öðru en að Gates hljóti einnig náð fyrir augum öldungadeildarinnar, þar sem allir nefndarmennirnir samþykktu útnefningu hans, en þeir eru 21 af 100 öldungadeildarþingmönnum.

Gates sagði nefndinni fyrr í dag að hann myndi gera Írak að forgangsverkefni sínu því þar stæði Bandaríkjaher höllum fæti við hlið íraskra öryggissveita og stjórnvalda. Einnig sagðist hann vera mótfallinn því að Bandaríkjamenn gerðu innrás í Íran nema að þrautreyndum samningaviðræðum og milligöngu bandamanna.