Viðræður milli uppreisnarmanna og stjórnarerindreka í Sómalíu

Þingforseti sómalska þingsins er nú í höfuðborg landsins, Mogadishu, í viðræðum við íslamska uppreisnarmenn. Eru viðræðurnar nýjasta tilraunin til þess að reyna að koma í veg fyrir stríð á milli stjórnarinnar og uppreisnarmanna.

Vitni segja að hermenn beggja aðila hafi verið að undirbúa sig fyrir stríð undanfarna viku. Stjórnvöld í Sómalíu óttast þó að þingforsetinn ætli sér einn að standa að nýrri stjórn í Sómalíu og útiloka þar með núverandi stjórn.

Ef af átökum verður er óttast að allt svæðið gæti dregist inn í átökin. Eþíópía og Erítrea eru gamlir fjandmenn og líklegt er að þau gætu dregist inn í þessi átök. Sómalía hefur verið undir stjórn uppreisnar- og vígamanna síðan 1991 og engin stjórn hefur verið við lýði í öllu landinu síðan þá.