De Beers vill útrýma blóðdemöntum

Demantarisinn De Beers óttast að frumsýning kvikmyndarinnar "Blóðdemanturinn" með Leonardo DiCaprio hafi neikvæð áhrif á gimsteinasölu og hvetur því til áhrifaríkari herferðar gegn svokölluðum átakademöntum eða blóðdemöntum sem uppreisnarmenn og vígahópar í mörgum Afríkuríkjum selja á svörtum markaði til að fjármagna áframhaldandi átök.

Kimberly-átakið svonefnda, sem er átak margra stórra demantasala og landa sem eiga demantanámur til að kveða niður ólöglega sölu demanta til vopnakaupa, hefur verið harðlega gagnrýnt fyrir að halda ekki vatni og vera ekki nógu áhrifaríkt verkfæri í baráttunni.

Nýleg skýrsla viðurkennir að Kimberley-átakið hafi dregið mjög úr ólöglegum demantaviðskiptum en bendir um leið á að ekki hafi verið tekist á við alvarlega galla og vankanta í herferðinni. Rannsóknir óháðra alþjóðasamtaka og Sameinuðu þjóðanna komu upp um stórtæka fölsun á upprunavottorðum demanta frá Brasilíu og Gvæana, sem og demantaþvott á demöntum sem uppreisnarsveitir á Fílabeinsströndinni notuðu til að fjármagna vopnakaup sín. Kimberley-átakið hefur í þessum tilfellum og fleiri brugðist hlutverki sínu með því að taka ekki harðar á svindlinu.

De Beers fer með ríflega helming af allri demantaverslun í heiminum, - alltént því sem er löglegt og uppgefið.