Öryggisráðið neitar að taka harða afstöðu í málefnum Vestur-Sahara

Ályktun öryggisráðsins var ekki skref í átt til lausnar í elstu landamæradeilu í Afríku heldur ávísun á sama ástandið í sex mánuði til viðbótar. Öryggisráðið segist hins vegar styðja lausn sem "stuðlar að sjálfsyfirráðum þjóðflokkanna í Vestur-Sahara." Danir óskuðu eftir því að öryggisráðið lýsti yfir áhyggjum sínum yfir mannréttindabrotum í Vestur-Sahara, þar sem Marokkóbúar hafa ráðið lögum og lofum síðustu 30 árin í óþökk innfæddra.

Frakkar, sem halda verndarhendi yfir fyrrverandi nýlendu sinni, Marokkó, settu sig hins vegar upp á móti dönsku tillögunni, neituðu að styðja hana og fengu að lokum nokkrar aðrar ríkisstjórnir til liðs við sig, þar á meðal Bandaríkin. Franska sendinefndin neitar hins vegar að samþykkja þessa sögu sem fjölmiðlar hafa eftir öðrum diplómötum.

Hvítir bílar friðargæslu Sameinuðu þjóðanna hafa í 15 ár gætt vopnahlés milli Marokkóbúa og innfæddra sem vilja sjá Marokkóbúa hafa sig á brott af landsvæðinu sem er um 266.000 ferkílómetrar. Um 340 þúsund manns búa í Vestur-Sahara.