64 talibanar drepnir í gær og í dag

64 herskáir talíbanar hafa verið drepnir í aðgerðum bandamanna í Afganistan í gær og í dag. Aðgerðirnar eru til komnar vegna vaxandi ofbeldis í Afganistan en það hefur ekki verið meira frá því að bandamenn steyptu stjórn Talibana af stóli árið 2001.

Síðan aðgerðir bandamanna, hófust fyrr í mánuðinum hafa tæplega hundrað og fimmtíu talibanar látið lífið og sextíu til viðbótar verið handteknir, samkvæmt upplýsingum frá afganska varnarmálaráðuneytinu. Það er til komið vegna vaxandi ofbeldis í landinu undanfarna mánuði, þar sem 600 manns hafa látið lífið.

Aðgerðin ber nafnið fjallaáhlaupið og er þetta umfangsmestu hernaðaraðgerðir í Afganistan síðan stríðinu í Afganistan lauk.

Talíbanar hafa nú safnast saman og safnað liði í fjallahéruðunum Kandahar og Uruzgan og hafa sagt að markmið sitt sé að reka allt erlent herlið frá Afganistan. Sendiherra Bandaríkjanna í Afganistan sagði nýverið að eiturlyfjabarónar kyntu undir ofbeldi í landinu vegna átaks ríkisstjórnarinnar gegn ræktun ópíumvalmúa og framleiðslu ópíums og annarra eiturlyfja.

Bandamenn hafa sagt að fjallaáhlaupið haldi áfram, og að barist verði gegn uppreisnarmönnum talibana í suðurhéruðum Afganistans með sömu hörku og hefur verið.