Fótboltinn sameinar

Til átaka kom á milli palestínskra mótmælenda og ísraelskra hermanna í bænum Bílín á Vesturbakkanum í gær vegna múrsins sem verið er að reisa á landamærunum. Allt féll hins vegar í dúnalogn þegar deilendur töldu sig skyndilega hafa mikilvægari hnöppum að hneppa.

ðskilnaðarmúr Ísraela er mikill þyrnir í augum íbúa Vesturbakkans og því eru mótmæli við byggingu hans engin nýlunda. Ísraelar segja hann nauðsynlegan til að halda palestínskum hryðjuverkamönnum frá ísraelskum borgum en Palestínumenn benda á að múrinn sé reistur í trássi við alþjóðalög og slíti jafnvel þorp og bæi í sundur. Á dögunum lýsti Ehud Olmert forsætisráðherra Ísraels því yfir að verkinu yrði lokið í lok þessa árs og múrinn myndi upp frá því marka landamæri Palestínu og Ísraels. Í gær var enn einu sinni efnt til mótmæla við múrinn og kom þá til átaka á milli mótmælenda og ísraelskra hermanna. Nú bar hins vegar svo við að hlé var gert á átökunum þar sem mikilvægari málum þurfti að sinna - heimsmeistarakeppninni í knattspyrnu. Allir virtust skemmta sér hið besta yfir leiknum og gleyma um stund þeim áhyggjum sem hvíldu á þeim fyrr um daginn.

Þótt oft sé hart tekist á á fótboltavellinum eru það einmitt viðburðir eins og HM í knattspyrnu sem færa lönd og lýði nær saman. Tímaritið Economist víkur einmitt að þessu í nýlegu hefti sínu.

Þar er heimsmeistarakeppnin borin saman við Ólympíuleikana sem oft hafa verið notaðir sem áróðurstæki voldugustu ríkja heims, t.d. Þýskalands nasimans og risa kalda stríðsins. Sterkustu liðin á HM eru hins vegar ekki endilega þau áhrifamestu á vettvangi alþjóðastjórnmálanna, Brasilía og Argentína eru góð dæmi um það.