Nálægt því að ná samkomulagi um aðstoð til Írans

Fulltrúar sex stórvelda eru nálægt því að ná samkomulagi um endanlegt tilboð um aðstoð til Íransstjórnar, gegn því að auðgun úrans verði hætt. Ef tilboðinu verður ekki tekið á að grípa til refsiaðgerða. Þjóðirnar sex sem eiga fast sæti í öryggisráði Sameinuðu Þjóðanna hafa hingað til ekki náð að koma sér saman um hvernig eigi að tækla kjarnorkudeiluna við Írana.

Í gær funduðu hátt settir erindrekar frá þjóðunum sex í London um stöðuna sem upp er komin og að fundinum loknum bar þeim saman um að stutt væri í að þjóðirnar kæmu sér saman um endanlegt tilboð til Íransstjórnar. Í því er gert ráð fyrir að Írönum verði veitt margs konar aðstoð í tækni-, viðskipta- og öryggismálum, gegn því að stjórnvöld í Tehran hætti alfarið auðgun úrans. Gangi Íransstjórn ekki að tilboðinu verði gripið til aðgerða. En þar stendur hnífurinn enn í kúnni. Bandaríkjamenn vilja ekki útiloka að þessar aðgerðir feli í sér beinan hernað og Bretar og Frakkar útiloka það ekki heldur. Kínverjar og Rússar mega hins vegar ekki heyra á það minnst og fulltrúar þeirra segja útilokað að gengið verði lengra en að beita Írana viðskipta- og efnahagsþvingunum.