Tvískinnungur rauði þráðurinn

Árið 2005 var mótsagnakennt í mannréttindamálum í heiminum, því þótt margt hafi áunnist, grófu áhrifamiklar ríkisstjórnir undan væntingum um aukin mannréttindi. Þetta er í stuttu máli niðurstaða ársskýrslu mannréttindasamtakanna Amnesty International.

Að vanda kennir ýmissa grasa í skýrslu Amnesty International en alls njóta 150 lönd þess vafasama heiðurs að fá þar sérstakan kafla. 104 þeirra hafa beitt þegna sínum pyntingum eða annars konar illri meðferð, sem er sérlega dapurlegt í ljósi þess að 141 ríki í heiminum á aðild að sáttmála Sameinuðu þjóðanna gegn pyntingum.

Amnesty bendir til dæmis á Bandaríkjaþing hafi á síðasta ári samþykkt lög þar sem bann er lagt við pyntingum en sama þing stóð fyrir því að takmarka réttindi fanga í Guantanamo-fangelsinu á Kúbu verulega.

Þessi tvískinnungur bitnar verst á þeim snauðu og fátæku því vegna öryggismarkmiða voldugu ríkjanna gleymast hörmungar þeirra sem minna mega sín. Því er brýnt að alþjóðasamfélagið breyti um áherslur í framtíðinni.

Ekki er sérstaklega minnst á Ísland í skýrslunni nema að vikið er að því að hérlendis hafi rannsókn á ásökunum um fangaflug verið fyrirskipuð.