Útlitið dökknar hjá Prescott og Clarke

Tveir ráðherrar í bresku ríkisstjórninni berjast nú fyrir pólitísku lífi sínu en þrýstingur á að þeir segi af sér vegna hneykslismála fer vaxandi með degi hverjum.

Þegar Rod Richards ráðherra í ríkisstjórn íhaldsmanna varð uppvís af framhjáhaldi og hrökklaðist úr embæti í kjölfarið var Prescott einn þeirra sem gagnrýndi hann hvað harðast. Háværar raddir eru nú uppi um að Prescott segi sjálfur af sér og þarf ekki að koma á óvart að téður Richards er í hópi þeirra sem hvað ákafast skora á hann. Á meðan hann nýtur stuðnings Tony Blair forsætisráðherra virðist Prescott hins vegar ætla að sitja sem fastast. Meiri óvissa ríkir um framtíð Charles Clarke eftir að í ljós kom að ríflega eitt þúsund glæpamönnum af erlendu bergi brotnu hefði verið sleppt án þess að fjallað hefði verið um hvort reka ætti þá úr landi. Kröfur um afsögn Clarke hafa ágerst með hverjum deginum, ekki síst eftir að í ljós kom að nokkrir mannanna hafa þegar brotið af sér aftur, sumir alvarlega.

Í morgun greindi svo Lundúnablaðið Times frá því að Clarke hefði vitað um klúðrið í lok marsmánaðar en dregið að skýra forsætisráðherranum frá því í þrjár vikur. Stjórnmálaskýrendur segja líklegt blaðið hafi þar með greitt Clarke náðarhöggið.