Unglingsdrengur handtekinn fyrir morð í Belgíu

Belgíska lögreglan hefur handtekið 16 ára unglingsdreng sem grunaður er um að hafa átt aðild að morði á 17 ára strák í Brussel fyrr í þessum mánuði. Strákurinn neitaði að láta þjófa hafa MP3 spilarinn sinn og galt fyrir það með lífi sínu.

Samskipti hans við ódæðismennina náðust á eftirlitsmyndavél. Málið hefur vakið mikinn óhug í Belgíu og á sunnudag tóku 80 þúsund manns þátt í þögulli minningargöngu um drenginn.

Unglingsdrengurinn sem var handtekinn er af pólskum uppruna en félagi hans, sem er einnig talið að tengist málinu, er sagður hafa flúið til Pólands.