Ísraelskir arabar mótmæla

Þúsundir araba sem búsettir eru í Ísrael fóru í kröfugöngu í hinni helgu borg Nasaret í dag eftir að flugeldar voru sprengdir í Boðunarkirkjunni. Þar voru að verki gyðingur, kristin eiginkona hans og dóttir þeirra. Lögregla segist ekki vita hvað fjölskyldunni gekk til en hún úilokar þó að árásin hafi verið af pólitískum rótum runnin. Til átaka kom í kjölfar sprenginganna og hermir Reuters-fréttastofan að nokkrir tugir borgara og lögreglumanna hefðu meiðst í þeim.

Um fimmtungur íbúa Ísraels eru arabar sem ekki flýðu af hólmi eftir að stríð braust út fyrir botni Miðjarðarhafs árið 1948. Þeir eru ýmist kristnir eða múslimar. Grunnt hefur verið á því góða með þeim og gyðingum sem búa í Ísrael og því þurfti lítið til í gær til að upp úr syði.

Boðunarkirkjan er einn helgasti staður kristinna manna því í helli undir henni er sagt að María mey hafi fengið heimsókn frá erkienglinum Gabríel og hann tjáð henni að hún myndi fæða Jesú Krist.