Nýr leiðtogi Al Kaída í Írak hótar árásum á næstu dögum

Nýr leiðtogi Al Kaída samtakanna í Írak, Abu Hamza al-Muhajer, heitir því að hefna fyrirrennara síns, al-Zarqawis, og hótar hræðilegum árásum á næstu dögum. Þetta kemur fram í yfirlýsingu frá al-Muhajer sem birt var á internetinu í dag.

Þetta eru fyrstu skilaboðin sem nýr leiðtogi hryðjuverkasamtanna í Írak sendir frá sér eftir að samtökin tilkynntu nafn hans sem eftirmanns al-Zarqawis í gær. Hann varar óvini sína yfir að fagna láti al-Zarqawis því að hann hafi skilið eftir her ljóna í sinn stað. Hann segir helstu skotmörk árásanna verða herlið Bandaríkjanna og sjíamúslima og nefnir hann borgina Ramadi í vesturhluta Íraks, sem hugsanlegan vettvang komandi ofbeldis.

Yfirlýsingin birtist á vefsíðu sem birtir oft skilaboð frá herskáum hópum en ekki hefur fengist staðfest að yfirlýsingin sé ósvikin og raunverulega frá al-Muhajer.

Al-Muhajer virðist ekki vera upprunninn í Írak, frekar en fyrirrennari hans sem var frá Jórdaníu, en nafn hans hefur ekki komið fyrir í yfirlýsingum um starfsemi al Kaída í Írak né kemur það fyrir á listum Bandaríkjamanna yfir eftirlýsta menn. Bush Bandaríkjaforseti lýsti því hins vegar yfir í dag að al-Muhajer myndi nú þegar bætast við þann lista sem Bandaríkjamenn vilji frekar sjá dauða en lifandi.

Það vekur athygli nú að al-Muhajer birtir ekki andlit sitt og þykir það benda til að al Kaída samtökin telji al-Zarqawi hafa verið of vel þekktan á almannafæri og því reyni þau nú að gera starfsemi sýna leynilegri.