Miðasala hafin á Hróarskeldu

Þeir sem misstu af miðum á Hróarskelduhátíðina síðasta sumar geta nú drifið sig á netið og tryggt sér aðgang að sælunni næsta sumar. Uppselt var á hátíðina í fyrra, en þó ekki fyrr en nær dró hátíðinni. Ekkert hefur verið gefið upp um þau atriði sem verða á hátíðinni þó að skipuleggjendurnir hugsi langt fram í tímann og stærstu atriðin séu bókuð með a.m.k. árs fyrirvara.

75.000 miðar eru til sölu á hátíðina og fer tónleikagestum fjölgandi með hverju árinu. Í sumar voru fleiri gestir en nokkurn tíma frá útlöndum, þar af er búist við að á milli eitt og tvö þúsund Íslendingar fari á hátíðina. Erfitt er að reikna heildarfjöldann út þar sem margir kaupa miða í Danmörku eða öðrum löndum.

Hróarskelduhátíðin er hins vegar ekki aðeins til þess að skemmta tónleikagestum. Á hverju ári er safnað fyrir einu ákveðnu mannúðarmálefni. Hátíðin í ár halaði inn 15 milljónum íslenskra króna til baráttunnar gegn þrælahaldi í heiminum.

Nánar á heimasíðu Hróarskelduhátíðarinnar.