Bush og Blair óánægðir með árangur í Írak

George W. Bush Bandaríkjaforseti og Tony Blair, forsætisráðherra Bretlands, segja stríðið í Írak ekki hafa gengið eins vel og þeir hefðu vonast til. Bush sagði mörg mistök hafa verið gerð í tengslum við innrásina, þau alvarlegustu hafi verið pyntingarnar í Abu Graib fangelsinu. Blair er nú í opinberri heimsókn í Bandaríkjunum.

Blair fundaði fyrr í vikunni með forsætisráðherra Íraks, Nuri al-Maliki, sem sagði íraska þjóðvarðliða verða reiðubúna til að tryggja stöðugleika í landinu frá árslokum 2007. Bush og Blair voru hins vegar sammála um að alþjóðlegt herlið skyldi ekki yfirgefa Írak fyrr en yfirmenn herafla landanna tveggja teldu Íraka tilbúna til að halda uppi friði í landinu. Leiðtogarnir funda áfram í Hvíta húsinu í dag.