Bandaríkjamenn fjölga herstöðvum í A-Evrópu

Condoleezza Rice, utanríkisráðherra Bandaríkjanna, hefur gert víðreist síðustu daga til þess að efla og styrkja sambandið við gamla og nýja bandamenn. Hún er nú í Búlgaríu þar sem hún undirritaði samning um að sett yrði upp bandarísk herstöð í landinu.

Þar eiga að vera 2500 bandarískir hermenn að staðaldri, en þannig búið um hnúta að hægt verði að fjölga þeim stórlega á skömmum tíma. Búlgaría er eitt af nýju NATO-ríkjunum og tekur því fagnandi að fá bandaríska herstöð í landið. Rice var sömuleiðis ánægð með herstöðvasamninginn, sem gerður var til tíu ára.

„Þetta er samningur sem vissulega mun auka samvinnu okkar, að fá að deila búlgörskum æfingabúðum. Það eykur getu okkar til þess að vinna saman á hernaðarsviðinu. En samningurinn er meira en það. Þetta er í raun grundvallarsáttmáli í því breiða samstarfi sem Búlgaría og Bandaríkin hafa átt og eru að þróa með sér," sagði Rice.

Þetta hljómar dálítið kunnuglega, ef við förum nokkra áratugi aftur í tímann, á Íslandi.

Búlgaría er eitt af Balkanríkjunum og gekk í NATO árið 2004. Búlgarar vonast eftir að fá aðild að Evrópusambandinu á næsta ári. Íbúar í Búlgaríu eru tæpar átta milljónir. Gert er ráð fyrir að fyrstu bandarísku hermennirnir komi þangað í lok þessa árs, eða byrjun næsta. Ekki er þess getið í fréttum af þessum atburði hvort þangað verða sendar eins og fjórar F-15 orrustuþotur og nokkrar þyrlur.