Gefa 20 milljónir til aðstoðar

Rauði kross Íslands ætlar að leggja tuttugu milljónir króna til neyðaraðstoðar í Pakistan, úr neyðarsjóði sínum. Ekki hefur verið veitt fé úr þeim sjóði síðan snjóflóðin féllu vestur á fjörðum og er það til marks um hversu alvarlegt ástandið er í Kasmír. Rauði kross Íslands hyggst jafnframt senda tvo starfsmenn til Pakistans. Í fyrstu sögðu pakistönsk yfirvöld að fórnarlömb skjálftans væru á bilinu eitt til tvö þúsund. Nú, tæpum tveimur vikum síðar, er komið í ljós að þau eru orðin áttatíu þúsund og óstaðfestar fregnir herma að hundruð, jafnvel þúsundir til viðbótar látist á hverjum degi úr kulda og vosbúð. Aðstæður eru þær erfiðustu sem hjálparstofnanir hafa þurft að takast á við. Hér má sjá flokk hermanna á leið upp í fjallaþorp sem engin leið er að komast til nema fótgangandi, með hjálpargögn í bakpokum. Þeir bera síðan þá sem mest eru slasaðir eða hjálparþurfi niður á börum. Á sjötta tug svona hópa eru að störfum, en það er eins og dropi í hafið - þrjár komma þrjár milljónir manna eru taldar heimilislausar og þar með í bráðri neyð. Það er byrjað að snjóa til fjalla og ef ekki tekst að margfalda hjálparstarfið á næstu dögum, gætu fórnarlömb skjálftans jafnvel orðið fleiri en flóðbylgjunnar miklu í Indlandshafi á annan í jólum, en þá fórust á þriðja hundrað þúsund manns. Sendiherrar aðildarríkja Atlantshafsbandalagsins samþykktu í dag áætlun um að senda allt að 1.000 hermenn til að vinna að neyðarhjálp á jarðskjálftasvæðunum. Rauði kross Íslands ákvað á fundi sínum í dag að veita 20 milljónir króna úr neyðarsjóði sínum til hjálparstarfs í Kasmír. Ríkisstjórn Íslands hefur þegar lagt fram átján milljónir króna, en útilokar ekki að við þá upphæð verði bætt. Sólveig Ólafsdóttir, sendifulltrúi Rauða krossins á Sri Lanka, er á leið til hamfarasvæðanna í Kasmír og verður komin þar til starfa um helgina.