Tvö þúsund Bandaríkjamenn fallnir í Írak

Tvö þúsund Bandaríkjamenn hafa fallið í Írak síðan innrásin í landið hófst í mars 2003.

Í gærkvöldi var tilkynnt um þrjú dauðsföll bandarískra hermanna í Írak. Þar með hafa 2002 Bandaríkjamenn látist í stríðsátökum síðan ráðist var inn í Írak í mars árið 2003. Flest dauðsföllin urðu eftir að búið var að steypa Saddam Hussein af stóli og George Bush Bandaríkjaforseti sagði að hinu eiginlega stríði væri lokið. Öldungadeild Bandaríkjaþings minntist af þessu tilefni hinna látnu með einnar mínútu þögn í upphafi þingfundar í gær.

Stuðningur við innrásina hefur minnkað jafnt og þétt í Bandaríkjunum eftir því sem dauðsföllum þarlendra hermanna hefur fjölgað. Það kemur enda í ljós í nýrri könnun Gallup, CNN og dagblaðsins USA Today að vinsældir repúblikana og Bush forseta hafa sjaldan verið minni.

55 prósent Bandaríkjamanna myndu kjósa demókrata ef gengið yrði til kosinga nú samkvæmt könnuninni og aðeins 39 prósent aðspurðra sögðust myndu kjósa George Bush ef hann væri í framboði. Í öllum málaflokkum nema baráttunni gegn hryðjuverkum sagðist fólk treysta demókrötum betur en Repúblikönum.