Konan sem hleypti lífi í réttindabaráttu blökkumanna

Rosa Parks, konan sem hleypti lífi í réttindabaráttu blökkumanna með því að neita að standa upp fyrir hvítum manni í strætisvagni í Montgomery í Alabama, lést í hárri elli í fyrrakvöld.

Lengi vel voru lög í gildi í Suðurríkjum Bandaríkjanna sem kváðu á um aðskilnað hvítra og svarta. 1. desember 1955 neitaði Parks hins vegar að beygja sig undir ólögin með því að neita að standa upp fyrir hvítum farþega í strætisvagni í.

Hún var sett í fangelsi og sektuð. Málið vakti mikla reiði og í kjölfarið sniðgekk blökkumannasamfélagið í Montgomery, undir forystu Martin Luther King, strætisvagna bæjarins í rúmt ár. Það var hins vegar ekki fyrr en tæpum tíu árum síðar sem samþykkt voru lög sem bönnuðu alla mismunun á grundvelli kynþáttar.

Parks kvartaði oft undan þeim sem héldu því fram að hún hefði ekki gert sér grein fyrir þýðingu staðfestu sinnar heldur einungis verið þreytt. Þvert á móti hafði barátta hennar fyrir bættum réttindum staðið lengi og því vissi hún nákvæmlega hvað hún var að gera.