Ísraelar hóta loftárásum

Ísraelski embættismaðurinn Eival Gilady, sem skipuleggur brottför Ísraela af Gaza-svæðinu, sagði í gær að þeir myndu beita loftárásum til að stöðva árásir Palestínumanna, jafnvel þótt þær kostuðu almenna borgara lífið. Hann sagði Ísraela þó helst vilja beita sér með nákvæmari hætti en þeir myndu ekki hika við að nota þyrlur og flugvélar til árása ef þeir teldu sig tilneydda. Þessi yfirlýsing kemur í kjölfar leiðtogafundar þeirra Ariels Sharon og Mahmouds Abbas á þriðjudag, en andrúmsloftið á fundinum var stirt. Sharon hóf fundinn á því að átelja Abbas vegna aukins ofbeldis af hálfu uppreisnarmanna. Ofbeldi hefur vaxið jafnt og þétt síðan vopnahléssamkomulagið var gert í febrúar síðastliðnum. Ísraelar héldu áfram aðgerðum gegn samtökunum Heilagt stríð og handsömuðu ellefu uppreisnarmenn til viðbótar aðfaranótt miðvikudags. Eftir fundinn var Sharon ánægður með samkomulag um algera samræmingu milli ísraelskra og palestínskra stjórnvalda sem tryggja á að brottförin gangi vel fyrir sig, en hún á að fara fram eftir um tvo mánuði. Palestínumenn voru ekki jafn sáttir. Ahmed Qureia, forsætisráðherra Palestínu, sagði að honum loknum:"Í öllum þeim grunnmálefnum þar sem við vonuðumst eftir jákvæðum viðbrögðum voru þau engin." Palestínumenn fóru fram á að fá meiri hergögn fyrir palestínsk stjórnvöld í Gaza, að norðurhluti Vesturbakkans færi undir þeirra stjórn og að ferðaöryggi milli Vesturbakkans og Gaza yrði tryggt eftur brottförina. Ísrelar segja á hinn bóginn að Sharon hafi boðið mikið, en hann lofaði að afhenda Palestínumönnum stjórn tveggja bæja á Vesturbakkanum innan tveggja vikna, að sleppa fleiri föngum og að auka ferðafrelsi Palestínumanna inn í Ísrael. Þótt fundurinn hafi ekki gengið vel er ekki talið að friðarferlið sé í uppnámi.