Eigandi næturklúbbs myrtur

Lögreglan í Lundúnum handtók í gærkvöldi tvo menn sem grunaðir eru um aðild að hrottalegu morði á tuttugu og fjögra ára gömlum manni sem rak vinsælan næturklúbb fyrir samkynhneigða. Hinir handteknu eru 33ja og 25 ára og voru þeir yfirheyrðir vegna málsins í nótt. Hinn látni hlaut svo mikla áverka á höfði að ættingjar hans þekktu hann ekki. Morðið hefur vakið gríðarlegan óhug í Lundúnum. Vitni herma að árásarmennirnir hafi hrópað slagorð gegn samkynhneigðum áður en þeir frömdu ódæðið.