Ofbeldismenn skyldaðir í meðferð

Heimilisofbeldi er blettur á samfélaginu sem erfitt er að fást við. Hér á landi eiga konur, sem eru fórnarlömb slíks ofbeldis, skjól í Kvennaathvarfinu. Austurríkismenn hafa fundið aðra lausn á þessu máli. Rosa Logar er forstöðumaður miðstöðvar gegn heimilisofbendi í Vín, þar sem farin hefur verið önnur leið en víða annars staðar í að bregðast við heimilisofbeldi. Austurríkismönnum þótti ekki eðlilegt að fórnarlömbin yrðu að flýja heimili sitt, heldur væri réttara að ofbeldismenn væru fjarlægðir af heimilinu. Rosa segir þetta í raun virka eins og rautt spjald. Ofbeldismaðurinn sé fjarlægður og allir hafi tíma til að hugsa sinn gang. Oft dugir tíu daga bannið til að ástandið á heimilinu breytist, í það minnsta um hríð. Aðeins í tíu prósentum tilvika kemur til ofbeldis sem er kært á ný. Ráðgjafastöðvar fyrir fórnarlömb heimilisofbeldis fá þegar að vita af því þegar lögregla grípur til þessara aðgerða og sama gildir um ráðgjafastöðvar fyrir ofbeldismennina. Þeir eru skyldaðir í hópmeðferð í þrjátíu daga og verður það oft til þess að þeir gera sér grein fyrir því hvert vandamálið er.