Banvænn stofn flensu greinist í Króatíu

H5N1-stofninn af fuglaflensu hefur greinst í Króatíu. Þetta var staðfest í morgun. Fuglaflensa hefur enn á ný greinst í Kína, að þessu sinni í rúmlega fimm hundruð öndum og kjúklingum í Hunan-héraði.

Þegar hafði verið greint frá því að fuglaflensa hefði komið upp í svönum í Króatíu en ekki var vitað hvort um mannskæða H5N1-stofninn væri að ræða. Heilbrigðisyfirvöld í Króatíu staðfestu í morgun að svo væri. Fuglabændur hafa verið hvattir til að halda fiðurfénaði innandyra á meðan frekari rannsóknir fara fram.

Þá standa einnig yfir rannsóknir á því hvort tilvik sem komu upp í gæsum Þýskalandi hafi verið af H5N1-stofninum mannskæða, en það liggur ekki enn fyrir.

Á undanförnum tveim vikum hefur verið tilkynnt um útbreiðslu fuglaflensu á þrem stöðum í Kína. Í gær var sagt frá fuglaflensu í gæsum í Anhui-héraði og nú eru það endur og kjúklingar í Hunan-héraði sem er í miðhluta Kína. Yfirvöld þar hafa þegar fargað 2500 fuglum í varúðarskyni. Í Kína hafa menn ekki enn látist af völdum fuglaflensu, en yfirvöld hafa engu að síður ákveðið að grípa til víðtækra varúðarráðstafana og birgja sig upp af flensulyfjum.

Matvælaeftirlit Evrópusambandsins hvatti í gær Evrópubúa til að forðast að borða hrá egg og meðhöndla fuglakjöt af varfærni. Um alla álfuna hefur neysla fuglakjöts dregist verulega saman vegna frétta af fuglaflensu