Greinist á enn fleiri stöðum

Enn á ný hefur fuglaflensa greinst í Kína, að þessu sinni í rúmlega fimm hundruð öndum og kjúklingum í Hunan-héraði. Yfirvöld þar hafa fargað tvö þúsund og fimm hundruð fuglum í varúðarskyni. Á undanförnum tveim vikum hefur verið tilkynnt um útbreiðslu flensunnar á þrem stöðum í Kína. Þar hafa menn ekki enn látist af völdum hennar en yfirvöld hafa engu að síður ákveðið að grípa til víðtækra varúðarráðstafana.

Matvælaeftirlit Evrópusambandsins hvatti í gær Evrópubúa til að forðast að borða hrá egg og meðhöndla fuglakjöt af varfærni. Um alla álfuna hefur neysla fuglakjöts dregist verulega saman vegna frétta af fuglaflensu.