Skotið á herskáa Palestínumenn

Ísraelsk herþota skaut í morgun sprengjum að vígi herskárra Palestínumanna í borginni Beit Hanoun á Gaza. Hópur sem tengist Fatah-hreyfingunni heldur til í byggingunni en enginn virðist hafa slasast í árásunum.

Hópurinn stóð fyrir hefndaraðgerðum eftir að Ísraelsmenn réðu palestínskan flóttamann af dögum í síðustu viku. Tveim heimatilbúnum sprengjum var þá skotið frá Gaza inn í Ísrael. Ísraelsstjórn hefur margoft lýst því yfir að slíkum árásum verði svarað og því má segja að árásirnar í morgun hafi ekki þurft að koma á óvart.