Þúsundir bíða enn eftir læknishjálp

Þúsundir manna í fjallahéruðum Pakistans bíða enn eftir að komast undir læknishendur, tveimur vikum eftir jarðskjálftann mikla sem varð meira en 50 þúsund manns að bana.

Hjálparstarfsmenn komast smám saman hærra upp í Himalayafjöllin. Í bænum Balakot fundu þeir fyrir hinn fimm ára Latif, sem var í skóla þegar skjálftinn skók fjöllin allt í kringum hann. Hann er með höfuðáverka og handleggsbrot en komst fyrst til læknis í dag. Carlos Urkia, læknir spænska Rauða krossins, segir hjúkrunarlið fást við beinbrot, sár og ýmis koanr áverka og áföll. Í sumum tilfellum sé fólk að fá sína fyrstu umönnun.

Latif er heppinn. Hann lifði af og læknar telja að hann muni ná sér að fullu. Systir hans og amma létu hins vegar lífið. Annað fórnarlamb skjálftans, Zawar Jan, kom gangandi niður úr þorpinu sínu, ofar í bröttum fjöllunum, til þess að komast til lækna. Hann sagði að allir vegir til þorpsins séu eyðilagðir.

Talið er að þrjár milljónir manna hafi misst heimili sín í skjálftanum. Margir þeirra hafa nú ekkert húsaskjól. Í fjöllunum fer hitastig undir frostmark á nóttunni og fyrsti vetrarsnjórinn er væntanlegur eftir um það bil mánuð.