Sprengingar við hótel fréttamanna í Bagdad

Að minnsta kosti tólf manns létu lífið þegar þrjár sprengjur sprungu við tvö hótel erlendra fréttamanna í Bagdad í dag. Sprengjurnar sprungu við Sheraton-hótelið og Palestínska-hótelið, sem standa hlið við hlið í miðri borginni. Bandarískir hermenn standa að jafnaði vörð við þessi hótel. Talið er að tvær bílsprengjur hafi verið notaðar við þessi tilræði og í þriðja tilfellinu hafi maður sprengt sprengju sem hann bar á sér.

Hótelin standa við Firdus-torgið, þar sem risastórri styttu af Saddam Hussein var steypt af stalli þegar innrásarherirnir náðu Bagdad á sitt vald árið 2003. Ekki er vitað á þessari stundu hverjir það voru sem létu lífið, eða særðust, en sem fyrr segir halda erlendir fréttamenn til í þeim báðum.