Kaczynski fékk 54 prósent atkvæða

Endanlegar niðurstöður liggja nú fyrir í pólsku forsetakosningunum sem fram fóru um helgina. Eins og áður hafði verið greint frá fór Lech Kaczynski, borgarstjóri í Varsjá, með sigur af hólmi, en hann hlaut 54 prósent atkvæða en andstæðingur hans, Donald Tusk 46 prósent. Kjörsókn var 51 prósent.

Kaczynski, sem tilheyrir flokknum Lög og réttlæti, er mjög íhaldssamur og hliðhollur kaþólsku kirkjunni. Hann bannaði meðal annars gleðigöngu samkynhneigðra í Varsjá í sumar, en þeir fóru engu að síður í göngu og voru studdir til þess af stjórnmálamönnum og samtökum frá Vestur-Evrópu.