Reykingabann í Bretlandi?

Ráðherrar bresku ríkisstjórnarinnar sitja nú á fundi, þar sem tekin verður ákvörðun um hvort banna eigi reykingar á öllum opinberum stöðum á Bretlandi.

Heilbrigðisráðherrann Patricia Hewitt mun á fundinum leggja fram hugmyndir um algjört reykingabann fyrir félaga sína í ríkisstjórninni. Ef reykingabannið nær fram að ganga myndi það ná til allra öldurhúsa og skemmtistaða. Tillagan gerir þó ráð fyrir að í hverri byggingu mætti vera eitt reykherbergi, en þar yrðu ekki bornir fram drykkir.

Upphaflega stóð til að byrja á að banna aðeins reykingar þar sem borinn er fram matur, en leyfa þær í einkaklúbbum og skemmtistöðum sem ekki selja mat. Ríkisstjórn Bretlands taldi það hins vegar ómögulegt í framkvæmd og því var ákveðið að stíga annað hvort skrefið til fulls eða ekki.

Ljóst er að fundurinn í dag verður ekki átakalaus, því að margir innan ríkisstjórnarinnar eru andvígir algjöru reykingabanni. Sumir vilja jafnframt ganga enn lengra og taka út ákvæði um að leyfa reykingar í þar til gerðum herbergjum.

Algjört bann við reykingum á opinberum stöðum er nú þegar í gildi á Írlandi og verður bráðlega lögleitt í Skotlandi og á Norður Írlandi.