Danskir múslimar ævareiðir

Mótmæli danskra múslima vegna birtinga skopmynda af spámanninum Múhammeð, í Jyllandsposten í lok september hefur nú teygt sig út fyrir dönsk landamæri.

Ekki eru nema tíu dagar síðan danskir múslimar mótmæltu skopmyndabirtingunni á Ráðhústorginu og kröfðust aðgerða að hálfu stjórnvalda. Í síðustu viku sendu ellefu múslimskir sendiherrar í Danmörku forsætðisráðherranum, Anders Fogh Rassmussen, beiðni um fund um leið og þeir kröfðust þess að hann hlutaðist til um málið og setti ofan í við fjölmiðla.

Forsætisráðherrann neitaði að hitta sendiherrana og sagði að múslimsk trúarbrögð væru ekki undanþegin tjáningarfrelsi frekar en önnur. Í kjölfarið hafa borist hávær mótmæli frá tæplega sextíu löndum í Alþjóðasamtökum múslima. Mikil umræða hefur skapast um málið í Danmörku og eru bæði móttherjar og samherjar Fogh Rassmussen honum sammála.