Eldgos á Galapagoseyjum

Eldfjallið Sierra Negra á Galapagoseyjum byrjaði í gær að gjósa með miklum látum. Eldtungurnar úr hinu fimmtán hundruð metra háa fjalli breiddust um stórt svæði, en íbúar í nágrenninu eru þó ekki taldir í hættu.

Öllum ferðamannastöðum í grennd við fjallið hefur þó verið lokað í varúðarskyni. Ekki er enn ljóst hve mikil áhrifin verða á gróður og dýr, á eyjunni Isabela sem er sú stærsta af Galapagoseyjum. Hún er fræg fyrir fallega náttúru og einstaklega fjölbreytt dýralíf en líklega enn frægari fyrir að verða Charles Darwin innblástur að þróunarkenningunni.