Sex farast í Cancun

Mikil eyðilegging blasir við í Cancun í Mexíkó þar sem fellibylurinn Wilma gekk yfir um helgina. Minnst sex fórust í óveðrinu. Strandbærinn Cancun er umflotinn vatni. Fjöldi húsa, bæði þar og í bænum Playa del Carmen, hefur eyðilagst og hafa tré rifnað upp með rótum. Vatnsflaumurinn er gríðarlegur og er vatn á nokkrum hæðum sumra hótela meðfram ströndinni, þannig að ljóst er að skemmdir eru verulegar. Wilma telst nú vera þriðja stigs fellibylur, en var fjórða stigs bylur í gær. Þúsundir þeirra ferðamanna, sem ekki náðu að koma sér í burtu áður en óveðrið skall á, hafast nú við í neyðarskýlum og bíða þess að veðrið gangi niður. Yfirvöld í Mexíkó hafa sent mat og lyf til þeirra svæða sem urðu verst úti og áformar Vicente Fox, forseti landsins, að fara til Cancun í dag til að kíkja á skemmdirnar. Búist er við að Wilma komi að Flórída-keys eyjaklasanum og Kúbu á morgun og hefur neyðarástandi verið lýst yfir á báðum stöðum, auk þess sem bæði heimamenn og ferðamenn eru hvattir til að yfirgefa svæðin. Og á meðan Wilma gengur enn yfir, hefur enn ein hitabeltislægðin myndast í Karíbahafi, skammt frá Haítí og Dóminíska lýðveldinu, en veðurfræðingar telja að hún fari þar yfir og færi sig síðan nær Bahama-eyjum. Nú dugar hins vegar ekki lengur latneska stafrófið til, við að gefa hitabeltislægðunum karlamanns- og kvenmannsnöfn, því í fyrsta skipti frá því byrjað var að gefa þeim nöfn með stöfum frá A til W, verður að grípa til þess ráðs að nota gríska stafrófið og hefur lægðin við Haítí verið nefnd Alfa. Hún er 22. hitabeltislægðin á svæðinu í haust og hafa ekki fleiri lægðir myndast á eins skömmum tíma, frá því byrjað var að skrá þær fyrir 150 árum.