Neyðarástand á Yukatanskaga

Fellibylurinn Wilma fer nú yfir Yukatanskaga í Mexíkó og flæðir gríðarlegur sjór yfir baðstrandarbæinn Cancun. Allt að átta metra djúpt vatn er á sumum svæðum. Vindhraðinn í óveðrinu hefur náð allt að sextíu og einum metra á sekúndu. Lýst hefur verið yfir neyðarástandi í fimmtíu og fimm héröðum á Yukatanskaga. Eitt dauðsfall hefur verið rakið til fellibylsins, en 33 ára gömul kona fékk raflost og lést í Cancun þegar hún var að búa hús sitt undir óveðrið. Óttast er að Wilma kunni að valda miklum skemmdum á svæðinu, en þegar hafa mörg hús eyðilagst og tré, sem rifnað hafa upp frá rótum, liggja á víð og dreif. Þúsundir ferðamanna eru strandaglópar í Cancun, en þeim hefur flestum verið komið fyrir í neyðarskýlum, fjarri strandlengjunni. Miðja fellibylsins er nú við bæinn Playa del Carmen, en þar eru aðstæður hættulegar þessa stundina þar sem brak og annað lauslegt flýgur á miklum hraða um götur bæjarins. Mikið úrhelli fylgir Wilmu og í gær mældist úrkoma á Mujeres-eyju við Júkatan-skaga um 590 millimetrar, sem er mesta úrhelli sem mælst hefur á svæðinu á einum degi. Á eynni Kúbu hafa hátt í 400 þúsund manns yfirgefið heimili sín við strandlengjuna af ótta við gríðarleg flóð í kjölfar Wilmu. Búist er við að fellibylurinn færi sig í átt til suðurhluta Flórída á morgun, en veðurfræðingar telja að þá verði styrkur bylsins orðinn minni, en hann er nú. Engu að síður hafa íbúar á Flórída-Keys eyjaklasanum verið hvattir til að gera varúðarráðstafanir og ferðamenn hvattir til að forða sér.