Lögfræðingur tekinn af lífi

Lögmaður eins sakborninganna í réttarhöldunum gegn Saddam Hussein og félögum hans fannst myrtur á götu í Bagdad í gær. Morðið er áfall fyrir alla sem að réttarhöldunum koma. Saadoun Sughaiyer al-Janabi var rænt af skrifstofu sinni í fyrradag af tíu grímuklæddum byssumönnum, en hann er verjandi Awad Hamed al-Bandar, fyrrverandi yfirdómara byltingardómsstóls Baath-flokksins. Í gær fannst svo lík hans á gangstétt í austurhluta Bagdad en hann hafði verið skotinn tveimur skotum í höfuðið. Mikil öryggisgæsla er í Bagdad vegna réttarhaldanna og hefur til dæmis nöfnum vitna og dómara verið haldið leyndum. Svo virðist hins vegar sem ekki hafi verið gert ráð fyrir að lögmenn sakborninganna væru í hættu og því áttu ódæðismennirnir jafn auðvelt með morðið eins og raun bar vitni. „Við fordæmum morðið sem skaðar réttarhöldin og stjórnmálaþróunina í Írak," sagði Laith Kubba, talsmaður ríkisstjórnarinnar, við blaðamenn í gær.