64 prósent greiddu atkvæði

Sextíu og fjögur prósent atkvæðabærra Íraka greiddu atkvæði í kosningum um nýja stjórnarskrá landsins, sögðu talsmenn kjörstjórnar Íraks í dag. Svo virðist sem stjórnarskráin hafi verið samþykkt. Þetta er nokkuð meiri kjörsókn en í kosningum til stjórnarskrárþings Íraks í janúar síðast liðnum, þegar kjörsókn var fimmtíu og átta prósent. Kosningaúrslit hafa ekki enn verið birt en svo virðist sem stjórnarskráin hafi verið samþykkt. Meirihluti kjósenda greiddi atkvæði með henni í flestum héruðum Íraks. Henni var hafnað með tveimur þriðju hlutum atkvæða í héruðunum Anbar og Salahaddin en ólíklegt þykir að svo mikil andstaða hafi verið við stjórnarskrána í öðrum héruðum. Hefðu tveir þriðju hlutar íbúa í þremur héruðum greitt atkvæði gegn stjórnarskránni hefði hún verið felld.