Vinna sameiginlega gegn flensunni

Heilbrigðisráðherrar aðildarríkja Evrópusambandsins munu vinna sameiginlega að því að vinna bug á fuglaflensufaraldri í álfunni. Þetta kom fram á fundi sem ráðherrarnir héldu í gær. Þeir segja forgangsverkefni að útvega nægar birgðir af bóluefni en voru þó sammála um að lítil hætta væri á faraldri í álfunni þó hún hafi greinst í Rúmeníu, Rússlandi og í Tyrklandi. Heilbrigðisráðherra Bretlands, sagði fuglaflensuna sjálfa og afbrigði hennar sem greinst hefði í mönnum vera tvo ólíka sjúkdóma og að ef rétt væri staðið að málum, yrði ekki um alheimsvandamál að ræða. Alls hafa um 120 manns smitast af veirunni í heiminum en þar af hefur sextíu og einn maður látist.