Norskum strandgæslumönnum rænt

Tveir eftirlitsmenn frá norsku strandgæslunni sem rússneskur togari rændi á sunnudagskvöld, eru enn um borð í togaranum. Rússnesk stjórnvöld hafa sent herskip á móti honum og er því ætlað að ná í Norðmennina. Rússarnir halda því fram að skotið hafi verið að þeim, en því neita norsk stjórnvöld. Á laugardagsmorguninn síðasta stöðvaði norska varðskipið KV Tromsö rússneska togarann Elektron skammt frá Svalbarða, rétt við Smuguna. Tveir starfsmenn strandgæslunnar fóru um borð í Elektron og mæltu fyrir um að togaranum skyldi siglt til hafnar í Tromsö, þar sem í ljós kom að fiskveiðilöggjöfin hafði verið margbrotin. Netmöskvar voru til að mynda of smáir. Eftir að hafa fylgt KV Tromsö í sólarhring, skipti rússneski skipstjórinn skyndilega um skoðun og stefndi til Rússlands. Varðskipið fylgdi togaranum eftir en mikil bræla var á leiðinni, ölduhæð átta til níu metrar og því ómögulegt fyrir varðskipið að freista þess að endurheimta mennina. Þyrla landhelgisgæslunnar sveimaði í kringum skipið og lýsti upp brúna til að reyna að fá það til að stansa en allt kom fyrir ekki. Nú er togarinn svo kominn inn í rússneska efnahagslögsögu og nálgast óðum tólf mílna landhelgina, sem gerir Norðmönnunum ókleift að aðhafast nokkuð frekar. Skipherrann íhugaði því að sögn að skjóta á togarann til að fá hann til að stansa. Úr því varð þó ekki, segir hann, en Rússarnir halda því fram að skotið hafi verið að þeim. Það auðveldar ekki málið að ný ríkisstjórn tók við í Noregi í gær, og var utanríkisráðherrann nýbakaði að setja sig inn í málið. Norðmennirnir tveir segja að vel sé farið með þá, en vistin sé samt ekki sú skemmtilegasta. TV2 í Noregi hefur eftir talsmanni rússneska sendiherrans í Ósló, að samkomulag hafi náðst um að rússneska herskipið Tvér muni mæta Elektron við tólf mílna mörkin milli klukkan fjögur og sex í nótt og ná í Norðmennina. Skipstóri Elektron segist vera á leið til hafnar í Murmansk, þaðan sem hann er gerður út, að skipan eigenda útgerðarinnar. Norðmenn vilja hins vegar að togarinn verði færður til norskrar hafnar og segja ekkert samkomulag hafa verið gert.