ESB fundar um fuglaflensu

Evrópskir sérfræðingar í fuglaflensu sitja nú á neyðarfundi vegna þeirra frétta sem bárust í gær að fuglaflensans sem greindist í Tyrklandi á dögunum hefði verið af hinum banvæna stofni H5N1 sem dregið hefur yfir 60 manns til dauða í Asíu. Talsmaður framkvæmdastjórnar Evrópusambandsins segir að rædd verði sú hætta sem Evrópu stafi af farfuglum í ljósi þess að fuglaflensan hefur færst enn vestar í álfunni. Í kjölfarið verði gefnar út leiðbeiningar um það hvernig forðast beri smit frá fuglum. Alþjóðaheilbrigðisstofnunin hefur þó bent á að veiran berist ekki auðveldlega á milli fugla og manna en mælir með því að fylgst sé með alifuglum og fólki vegna hugsanlegra fuglaflensueinkenna. Breskir vísindamenn rannsaka enn hvort fuglaflensuveiran sem fannst í þremur öndum í Rúmeníu í síðustu viku sé af hinum hættulega stofni en búist er við niðurstöðum síðar í dag. Tyrknesk yfirvöld segjast hafa náð að hemja útbreiðslu fuglaflensunnar en að þau séu á varðbergi, en margir farfuglar sem fljúga á milli Afríku og Rússlands eiga leið um Tyrkland.