Hyggjast reisa tjaldborgir

Pakistönsk yfirvöld hyggjast koma upp tjaldborgum fyrir hundruð þúsunda manna sem misstu heimili sín í jarðskjálftanum í landinu fyrir tæpri viku. Tjaldborgunum verið komið upp á fimm stöðum nærri borgunum Islamabad og Rawalpindi og verður mat dreift þar ásamt því sem svæðið verður hitað upp. Hjálpargögn hafa nú borist til flestra afskekktra svæða í pakistanska hluta Kasmír sem urðu illa úti í skjálftanum en óttast er að hún berist of seint til þeirra staða sem eftir eru. Jan Egeland, sem hefur yfirumsjón með alþjóðlegri hjálp á vegum Sameinuðu þjóðanna, sagði að keppst væri við að koma gögnum til afskekktra svæða en þörf væri á fleiri þyrlum til að koma hjálpargögnum til afskekktra svæða þar sem samgöngur á jörðu niðri hefðu farið algörlega úr skorðum.