Aron Pálmi áfram hjá vinum

Aron Pálmi Ágústsson fær að dvelja áfram hjá vinafólki í Tyler í Texas þar til rafmagn kemst á að nýju í Beaumont eftir fellibylinn Rítu. Hann getur því að óbreyttu snúið að nýju til síns heima þar sem hann á að vera undir eftirliti næstu tvö árin. Greint var frá því fyrr í dag að Aron Pálmi yrði ekki náðaður og þyrfti að öllum líkindum að dvelja tímabundið í fangelsi í Texas. Það jafngilti dauðadómi að mati Sæmundar Pálssonar, eins úr stuðningsmannahópi Arons. Farið var fram á að íslensk stjórnvöld leituðu liðsinnis forseta Bandaríkjanna. Fylkisþing Texasríkis samþykkti í ágúst að Aron Pálmi yrði náðaður og gengur því ríkisstjórinn, Rick Perry, þvert á vilja þingsins með ákvörðun sinni um að hafna náðunarbeiðninni. Forsvarsmenn RJF-hópsins sem unnið hafa að lausn Arons Pálma vilja að íslensk stjórnvöld beini spjótum sínum að Bandaríkjaforseta en ekki fylkisstjóranum við lausn málsins. Garðar Sverrisson, einn af stuðningsmönnum Arons Pálma, sagði að vitaskuld ættu íslensk stjórnvöld að beita sér í málinu. Honum væri ekki kunnugt um það að fram hefðu komið formleg mótmæli frá íslenskum stjórnvöldum, ekki hefði verið gert annað en að skríða á fjórum fótum í málinu. Samkvæmt upplýsingum frá sendiráði Íslands í Washington getur Aron Pálmi ekki snúið strax til Beaumont þar sem þar er allt rafmagnslaust eftir fellibylinn Rítu. Aron Pálmi reyndi sjálfur að reyna að finna húsnæði en ef það hefði ekki telist hefði hann þurft hann að dvelja í fangelsi í Texas þar til hann hefði getað snúið aftur heim til sín. Sæmundur Pálsson taldi í dag að það jafngilti dauðadómi fyrir Aron Pálma að dvelja í fangelsi. Hann benti á að barnaníðingar væru ekki teknir neinum vettlingatökum í bandarískum fangelsum eins og margar kvikmyndir og dæmi sanna. Litið yrði á Aron Pálma sem barnaníðing en hann sé það illa farin eftir allt málið að hann sæi það ekki að Aron Pálmi lifði það af. Í bréfi sem Aron Pálmi sendi frá sér í morgun kom fram að hann væri mjög niðurdreginn vegna ákvörðunar ríkisstjóra Texas. Hann sagðist þó vongóður um að ákvörðuninni yrði hnekkt og hann vonast eftir aðstoð íslenskra stjórnvalda. Ágúst Ólafur Ágústsson þingmaður Samfylkingarinnar hefur farið fram á utandagskrárumræður á Alþingi vegna máls Arons Pálma. Fréttastofa Stöðvar 2 og Bylgjunnar reyndi ítrekað að ná sambandi við Aron Pálma í dag, en án árangurs.