Bretar æfir vegna ummæla Chiracs

Það er ekki hægt að treysta fólki sem eldar óætan mat, segir Jacques Chirac, forseti Frakklands. Yfirlýsingar hans um breska matargerð hafa valdið úlfúð og uppnámi á Bretlandi - og raunar líka Finnlandi, því þar er maturinn ennþá verri að mati Chiracs. Á fundi þeirra Jacques Chiracs, Gerhards Schröder, kanslara Þýskalands og Vladímírs Pútíns, Rússlandsforseta, í Kalíníngrad á sunnudaginn sem hófst umræða um matargerðarlist og misgirnilegar máltíðir. Þegar Chirac hélt að blaðamenn heyrðu ekki til sagði hann lífsreynslusögu af því þegar Robertsson lávarður, sem var þá yfirmaður NATO, bauð honum upp á skoska þjóðarréttinn haggis, sem er líkur slátri. Það fannst Chirac svo ógeðslegt að hann vildi meina að þar mætti finna upphaf vandræða Frakka og NATO. Hann bætti gráu ofan á svart þegar hann lýsti þeirri skoðun sinni að eina framlag Breta til evrópsks landbúnaðar væri kúariða. Það væri hreinlega ekki hægt að treysta fólki sem gæti ekki eldað ætan mat. Hvergi væri að finna verri mat nema þá helst í Finnlandi. Schröder og Pútín hlógu dátt, og skari blaðamanna var nær en Chirac hélt, og því fréttist af skemmtisögum hans og yfirlýsingum, sem fallið hafa í grýttan jarðveg á Bretlandseyjum. Þarlend blöð ausa skömmum yfir Chirac og segja honum nær að halda sig á mottunni, því að svona lagað gæti haft áhrif á val ólýmpíuborgarinnar 2012, en hún verður valin á morgun. Bretar hafa þar lítið að segja enda Lundúnir í framboði, en Finnar eiga sæti í valnefndinni og gætu hefnt sín. Skotar segjast hins vegar ætla að sýna Chirac í tvo heimana - með fyrsta flokks mat á fundi leiðtoga átta stærstu iðnríkja heims í Gleneagles.