Ljónin björguðu lífi telpunnar

Þrjú ljón björguðu tólf ára gamalli eþíópískri telpu úr klóm mannræningja sem hugðust neyða hana í hjónaband. Stúlkunni hafði verið haldið í sjö daga og hún sætt barsmíðum. Þá skárust ljónin í leikinn, ráku illmennin á brott og biðu hjá telpunni uns lögreglan kom á vettvang nokkrum klukkustundum síðar. Dýrafræðingar telja að ljónin hafi að líkindum ruglað kjökri stúlkunnar saman við mjálm unga sinna og því hafi þau haldið yfir henni hlífiskildi. Fjórir mannanna hafa verið handsamaðir en þriggja er enn leitað.