Viss um að komast til valda á ný

Saddam Hussein saknar valdatíma Ronalds Reagan, segist ekki tengjast Osama bin Laden á nokkurn hátt og er handviss um að hann komist til valda í Írak á ný. Þetta kemur fram í viðtölum við fimm fangaverði sem hafa annast Saddam undanfarið ár og birtast í nýjasta hefti GQ. Fangavörðunum var fyrirskipað að meðhöndla forsetann fyrrverandi af virðingu og segja þeir meðferðina á honum hafa verið með besta móti. Segja þeir enn fremur að Saddam hafi kallað þá syni sína og að hann hafi gefið þeim góð ráð í kvennamálum og boðið þeim að koma til Íraks þegar hann tæki þar við völdum á nýjan leik. Þá segist hann ekki hafa dvalið langdvölum í holunni sem hann fannst í heldur hafi hann einungis falið sig þar þegar fréttist af hermönnum í nágrenninu. Að sögn fangavarðanna er Saddam haldinn sjúklegri hreinlætisáráttu og til að mynda þvær hann alltaf á sér hendurnar eftir að hafa tekið í höndina á fólki. Þá hefur hann einnig mikið dálæti á Doritos-flögum.