Ísland sem bjargvættur ESB?

Gætu Íslendingar séð Evrópusambandinu fyrir neyðarleið út úr þeirri kreppu sem upp kæmi ef Frakkar höfnuðu stjórnarskrársáttmála sambandsins í þjóðaratkvæðagreiðslu? Að þessu spyr leiðarahöfundur Financial Times í gær. Þannig er mál með vexti að staðfesti ekki allar hinar 25 núverandi aðildarþjóðir Evrópusambandsins stjórnarskrársáttmálann - sem í daglegu tali er oft kallaður stjórnarskrá en er í raun aðeins nýjasta uppfærsla stofnsáttmála ESB - getur hann ekki gengið í gildi. Lögformlega þyrfti því að endurtaka allt ferlið, kalla saman nýja ríkjaráðstefnu, ná nýjum málamiðlunum og fá útkomuna samþykkta af þingum og þjóðum aðildarríkjanna. Þetta tæki mörg ár. Þegar skoðanakannanir benda til að franskir kjósendur muni í atkvæðagreiðslu í lok maí hafna staðfestingu sáttmálans leita embættismenn ESB að leiðum til að koma þrátt fyrir það mikilvægustu uppfærslunum á stjórnkerfi ESB í gildi. Ein þessara hugsanlegu leiða væri að bæta þessum uppfærsluákvæðum við næsta nýja aðildarsamning. Þetta var leið sem fyrst kom til umræðu eftir að naumur meirihluti þeirra sem tóku þátt í þjóðaratkvæðagreiðslu á Írlandi höfnuðu árið 2001 svonefndum Nice-sáttmála, síðustu uppfærslu stofnsáttmálans fyrir stjórnarskrársáttmálann. En nú vill svo til að búið er að ganga frá aðildarsamningum Rúmeníu og Búlgaríu - utanríkisráðherrar sambandsins munu undirrita þá þann 25. þessa mánaðar. Næstu lönd í biðröðinni eru lönd eins og Króatía, Albanía og Tyrkland, og ekkert þeirra er líklegt til að ljúka aðildarsamningum fyrr en í fyrsta lagi árið 2009. Að sögn Financial Times horfa því sumir í Brussel vonaraugum til Íslands, sem er nú þegar það vel aðlagað ESB í gegnum EES-aðildina, að það gæti tekið stuttan tíma að ganga frá samningum um fulla aðild landsins. Með þeim samningum gæfist tækifæri til að koma nauðsynlegustu stofnsáttmálauppfærslunum í gagnið fyrr en ella. Leiðaranum lýkur á orðunum: "En væri Ísland tilbúið að taka slaginn? Ef eyþjóðin gæti boðið ESB lausn á stjórnskipunarvanda sínum kynnu ráðamenn þess að gera henni tilboð sem hún gæti ekki hafnað. Íslensku fiskimiðin yrðu örugg enn um sinn."