Tuttugu létust

Þrjár bílsprengjur voru sprengdar nánast samtímis fyrir utan hótel erlendra blaðamanna í Bagdad í gær. Í það minnsta tuttugu manns dóu í sprengingunum.

Síðdegis í gær var steypubíl hlöðnum sprengiefni ekið upp að varnargirðingum Hótel Palestínu í miðborg Bagdad en þar býr fjöldi erlendra blaðamanna.

Verðir reyndu að stöðva bílinn með því að skjóta á hann en svo fór að ökumanni hans tókst að brjótast í gegnum múrinn, aka að hótelinu og sprengja bifreiðina í tætlur. Innan tveggja mínútna sprungu tvær sprengjur til viðbótar.

"Áform tilræðismannanna eru augljós, að ná hótelinu á sitt vald og taka arabíska og aðra erlenda blaðamenn í gíslingu," sagði Mouwafak al-Rubaei, þjóðaröryggisráðgjafi Íraksstjórnar.

Talið er að tuttugu manns hafi farist í tilræðununum, þar af fimm lögregluþjónar, og fjörtíu til viðbótar slasast, flestir þeirra vegfarendur. Hótelið sjálft er mikið skemmt en að sögn bandarískra embættismanna lést enginn þar innandyra. Mikil ólga hefur verið í landinu undanfarið, síðastliðna tvo daga hafa alls 65 látist í árásum uppreisnarmanna.