Florida Keys á kaf?

Miðja Wilmu er nú við suðurströnd Flórída. Hún náði í nótt þriðja stigi á nýjan leik og hefur enn verið að eflast í morgun. Wilma er talsvert öflugri en fellibylurinn Charley, sem reið yfir Flórída í fyrra og olli þar miklu tjóni.

Arnar Vignisson, sem býr í Indialantik á Austurströnd Flórída segir að áhrifa Wilmu gæti verulega um allt fylkið, líka á austurströndinni, þó að ekki sé búist við miðju fellibylsins þar. Buið sé að loka skólum og fyrirtækjum víða og fólk beðið að halda sig heima við. Arnar segir að fólk hafi verið frekar óvenju þögult í morgun, en þó virðist fæstir beinlínis óttaslegnir. Hann segir að fólk á austurströndinni sé fyrst og fremst hrætt við hvirfilbyli.

Á Florida Keys eyjaklasanum óttast yfirvöld hið versta, enda er þar mjög, láglent.Meirihluti íbúanna á Florida Keys hefur hunsað ítrekaðar viðvaranir yfirvalda frá því í síðustu viku og langflestir eru enn heima við.

Öllum áttatíu þúsund íbúunum var fyrir helgina ráðlagt að hafa sig á brott, en í morgun höfðu aðeins um sex þúsund manns farið. Sérfræðingar spá því að vatnshæðin nái allt að fjórum til fimm metrum á Florida Keys. Hæð eyjanna er hvergi meiri en rétt rúmir fimm metrar, svo að ef verstu spádómar rætast fer þar allt á kaf.

Um helgina lagði Wilma þúsundir heimila í rúst í Mexíkó og minnst sjö manns létust þar af hennar völdum. Á Kúbu urðu sex hundruð þúsund manns að yfirgefa heimili sín í strandhéruðum. Þá hafast tugþúsundir manna við í neyðarskýlum á svæðunum sem Wilma hefur farið yfir.