Kaczynski var kjörinn forseti

Pólverjar kusu í gær Lech Kazcynski forseta sinn ef marka má útgönguspár. Donald Tusk, keppinautur hans, lýsti sig sigraðan fljótlega eftir að spárnar voru birtar.

Önnur umferð pólsku forsetakosninganna fór fram í gær en í fyrri umferðinni sem haldin var fyrr í mánuðinum fékk enginn frambjóðendanna tilskilinn meirihluta atkvæða. Í gær var kosið á milli þeirra Donalds Tusk og Lechs Kazcynski, borgarstjóra í Varsjá.

Fyrstu útgönguspár í gær bentu til að Kazcynski hefði borið sigur úr býtum. Spá TVN24 sjónvarpsstöðvarinnar gerði ráð fyrir að 53,5 prósent kjósenda hefðu kosið Kazcynski en aðeins 46,5 prósent Tusk.

"Í dag verð ég að viðurkenna að mér mistókst," sagði Tusk í ­ávarpi sínu til stuðningsmanna, dapur í bragði. Jaroslaw, tvíburabróðir Kazcynski, er leiðtogi flokksins Laga og réttlætis sem sigraði í þingkosningunum 25. september. Jaroslaw lýsti því hins vegar strax yfir að hann myndi ekki verða forsætisráðherra næði bróðir hans kjöri sem forseti. Endanleg úrslit munu liggja fyrir í dag.